Мәслихаттың 30-шы кезектен тыс сессиясында депутаттар 2025 жылға арналған қалалық бюджетті нақтылауды қолдады.
Депутат Диана Ерлан атап өткендей, Алматы әлеуметтік бағытты ұстануды жалғастыруда: қаржыландырудың едәуір бөлігі бұрынғысынша халықтың өмір сүру сапасын жақсартуға жұмсалатын болады.
«Әлеуметтік саланы қаржыландырудың жалпы көлемі 652,9 млрд теңгені құрады. Оның ішінде бюджеттің 27,9% – ы білім беру саласына бөлінді. Негізгі міндеттер балабақшаларға кезектерді азайту, оқушы орындарының тапшылығын жою, барлық деңгейлерде білім беру сапасын арттыру және қосымша оқытуды дамыту болып қала береді. Мектептердегі қауіпсіздік мәселелеріне көп көңіл бөлінеді. «Алматының 2023-2024 жылдарға арналған білім беру мекемелеріндегі Қауіпсіздіктің кешенді жүйесі» жобасы аясында қаланың 216 мектебінде цифрлық бейнекамералар, дабыл түймелері, турникеттер және күзет-өрт дабылдары орнатылды. Бұл барлық мектептерді қауіпсіздік жүйесімен жүз пайыз қамтуға мүмкіндік берді», – деп атап өтті Диана Ерлан.
Мәслихат депутаты Әміржан Нәбиевтің айтуынша, білім беру саласында оқу орындарын қайта құру, сейсмикалық күшейту және ағымдағы жөндеу жұмыстары жоспарланған. Бұдан басқа, қауіпсіздікті арттыруға, оқу жағдайларын жақсартуға және материалдық-техникалық базаны нығайтуға бағытталған пәндік кабинеттермен жарақтандыру көзделген.
«Денсаулық сақтау да басым бағыттардың бірі болып қала береді. Соңғы онжылдықтарда алғаш рет емханалар мен оңалту орталықтарын күрделі жөндеу, сондай-ақ қалалық ауруханалар, перзентханалар мен алғашқы медициналық стационарлық көмек орталықтары үшін заманауи медициналық жабдықтарды сатып алу жоспарлануда. Бұл медициналық көмектің сапасын арттыруға және қала тұрғындары үшін оған қолжетімділікті кеңейтуге ықпал етеді. Экологиялық жағдайды жақсарту мақсатында су айдындарын механикалық тазарту және жасыл аймақтарды дамыту жүргізілуде. Бұл шаралар санитарлық қауіпсіздікті арттыруға және экологиялық қолайлы қалалық ортаны қалыптастыруға мүмкіндік береді», – деді ол.
Нақтылау көлемі 97 млрд теңгені құрады, ол Мемлекеттік сатып алулар мен қаражатты қайта бөлу бойынша үнемдеу, өткен жылдың қалдықтарын пайдалану және бюджеттің кіріс бөлігінің өсуі есебінен қалыптасты. Әлеуметтік саланы, инфрақұрылымды дамытуға, ТКШ жаңғыртуға және қалалық ортаны цифрландыруға басты назар аударылды.